Ny talata 20 mey lasa teo no nandray ny Sendikan’ny Mpiasan’ny Kaominina Antananarivo Renivohitra, izay notarihan’Andriamatoa RAHARIJAONA Jean François, Filohan’ny SMKAR, ny Tale Jeneralin’ny Hetra, ny Talen’ny Teknika ara-ketra ary ny Lehiben'ny Sampan-draharahan'ny Fitantanana ny Hetra ifotony.

Nohamafisina tamin’izany ireo fanazavana amin’ny antsipirihany mahakasika ny fanovana izay entin’ny Lalàna mifehy ny Tetibolam-panjakana ho an’ny taona 2025, mikasika ny fitantanana ny Hetra amin’ny fananana mifaka, dia ny Hetran-tany (IFT) sy ny Hetran-trano (IFPB) izany.

Notsipihana, araka izany, fa ny fikajiana sy ny famoriana ihany no iandraiketan’ny Ministeran’ny Toekarena sy ny Fitantanam-bola amin’ny alalan’ny Sampan-draharahan'ny Hetra, fa ny fanisana ireo mpandoa hetra sy ny fisitrahana ny vola miditra amin’ny alalan’ny hetra kosa dia mijanona ho an’ny kaominina tanteraka. Tan-tsoroka araka izany no entin’ny DGI, amin’ny alalan’ny fametrahana andinin-dalàna mazava mandrindra ny fanaovana filazana ara-ketra sy ny fampiasana ireo fitaovana famorian-ketra manaraka ny haitao ara-kajy mirindra.

Nomarihana fa fanatsarana ny fampidiran-ketra ho an’ny Vondrom-bahoaka itsinjaram-pahefana indrindra no tanjona lehibe anatin’izao fanovana fomba fiasa izao. Fotoana iray nifampihainoana sy nitondrana fampahafantarana ireo kipitsopitsony rehetra mety ho mbola nanjavozavo tamin’ireo mpiara-miasa eo anivon’ny kaominina tokoa ny fihaonana omaly ary nampatsiahivana indray fa ny fampandrosoana ny toekarem-pirenena no ifanoloran-tanana satria « Mpirahalahy mianala » tokoa ny Kaominina sy ny Foibem-pitondrana Ankapoben'ny Hetra.